کولیسٹرول سے احتیاط اور علاج

کولیسٹرول ایک مومی یا چربی کی طرح کا مادہ ہے جو کہ ہمارے جگر میں سیر شدہ یا (سچوریٹڈ فیٹس) سے تیار ہوتا ہے۔ کولیسٹرول کی مناسب مقدار صحت مند خلیوں کے لیے بہت ضروری ہے
کولیسٹرول مالیکولز(سمال پیکجز) کی شکل میں خون کے بہاؤ کے ساتھ سفر کرتا ہے جن کو لیپوپروٹین کہتے ہیں۔

لیپوپروٹین کی بڑی 2 اقسام ہیں
ایچ ڈی ایل یعنی ہائی ڈینسٹی لیپو پروٹین

ایل ڈی ایل یعنی لو ڈینسٹی لیپوپروٹین

ایچ ڈی ایل یعنی ہائی ڈینسٹی لیپو پروٹین
اسے عام فہم زبان میں اچھا کولیسٹرول بھی کہا جاتا ہے۔کولیسٹرول کا صرف ایک تہائی یا ایک چوتھائی حصّہ ایچ ڈی ایل پر مشتمل ہوتا ہے۔ یہ برے کولیسٹرول کو پورے جسم سے سمیٹ کر واپس جگر میں لاتا ہے۔ جہاں ضروری کاروائی کے بعد اسے جسم سے خارج کر دیا جاتا ہے۔

ایل ڈی ایل یعنی لو ڈینسٹی لیپوپروٹین
جسےبرے کولیسٹرول کا نام بھی دیا جاتا ہے۔ جب ہم شکائت کے معنوں میں کولیسٹرول کا ذکر کرتے ہیں تو اس سے مراد ایل ڈی ایل ہی ہوتا ہے۔ ایل ڈی ایل بھی جسم کے لیے ضروری ہوتا ہے، تا ہم اگر اس کی مقدار خاص حد سے بڑھ جاۓ تو یہ شریانوں میں جمع ہو کر سخت قسم کا مادہ بناتا ہے۔ اس مادے کے جمع ہوتے رہنے سے شریانیں تنگ ہو جاتی ہیں۔ لہذا ان میں خون کی روانی کم ہو جاتی ہے۔

اگر اس سے دل کے پٹھوں کو خون پہنچانے والی نالیاں (کارونری آرٹریز) متاثر ہوں تو یہ کیفیت دل کے دورے کا باعث بنتی ہیں۔ اس کے برعکس اگر اس سے دماغ کو خون پہنچانے والی رگیں متاثر ہوں تو فرد سٹروک یعنی فالج کے خطرے سے دو چار ہو جاتا ہے۔

خون میں کولیسٹرول کی مقدار کتنی ہوئی چاہئیے
ماہرین کے مطابق ہم کولیسٹرول کی مقدار کے لحاظ سے لوگوں کو تین گروپوں میں تقسیم کر سکتے ہیں۔ جو کہ درج ذیل ہیں۔

جن کے خاندان میں دل کی بیماریاں، ذیا بطس، ہائی بلڈپریشر یا جگر کی بیماریاں نہیں ہیں۔ ان میں نہ مٹاپا ہے نہ تمباکو نوشی کرتے ہیں اور نہ ہی ان کی عمریں پچاس سال سے زیادہ ہیں۔ ایسے افراد کا ایل ڈی ایل یعنی برا کولیسٹرول 200 ملی گرام فی ڈیسی ملی لیٹر سے کم ہونا چاہئیے۔
دوسرا گروپ وہ ہے جس کے افراد کو کبھی ہاٹ اٹیک تو نہیں ہوا البتہ خاندان میں دل کی بیماریاں، ذیابطس، ہائی بلڈپریشر یا جگر کی بیماریاں موجود ہیں۔ ان کا ایل ڈی ایل یعنی برا کولیسٹرول 160 ملی گرام فی ڈیس لیٹر سے کم ہونا چاہئیے۔
تیسرا گروپ گروپ وہ ہے جنہیں اوپر ڈی گئی بیماریوں میں سے کوئی لاحق ہو گئی ہے ایسے افراد میں ایل ڈی ایل یعنی برے کولیسٹرول کی سطح 130ملی گرام فی ڈیسی لیٹر سے کم ہونی چاہئیے۔
برے کولیسٹرول سے کیسے بچیں
برے کولیسٹرول کی ذیادتی سے بچنے کے لیے مرغن کھانوں، گھی، چربی، بالائی، بڑے گھوشت، مکھن، پنیر،بسکٹ، اور بیکری کی اشیا سے بچنے کی ہر ممکن کوشش کرنی چاہئیے
کم مقدار میں کینولا، مکئی، سورج مکھی کا تیل استعمال کیا جاۓ۔ دیگر چکنائی زیتون، مچھلی، خشک میوہ جات، اجناس سے حاصل کی جا سکتی ہے۔ یہ چکنائی مضر صحت نہیں لیکن ان کو بھی اعتدال سے استعمال کیا جاۓ۔
پھل، سبزیاں، اناج اور دالیں ذیادہ استعمال کی جائیں۔ ہری سبزیاں،سلاد جیسی غذائیں وزن گھٹانے میں معاون ثابت ہونے کے ساتھ ساتھ کولیسٹرول کو بھی قابو میں رکھتی ہیں۔ خوراک میں سبز سبزیاں اور زرد فروٹ لازمی شامل کریں۔
30 سال کی عمر سے زائد افراد اور خواتین میں کولیسٹرول کی زیادتی کی شرح زیادہ ہوتی ہے۔ ہماری خوراک ایسی ہونی چاہئیے جس میں فائبر یعنی ریشہ زیادہ ہو۔ یہ کولیسٹرول کو لپیٹ کر نکال دیتا ہے۔
فاسٹ فوڈ سے اجتناب کرنا چاہئیے، یہ کولیسٹرول کو بڑھاتے ہیں۔

کیا آپ کو اپنے کولیسٹرول کی سطح کا علم ہے؟ زیادہ امکان یہی ہوگا کہ آپ اس حوالے سے بے خبر ہوں گے۔

لیکن یہ بے خبری خطرناک ہوسکتی ہے کیونکہ کولیسٹرول کی زیادہ سطح لاکھوں افراد میں دل کی بیماریوں کے خدشے میں اضافہ کرتی ہے اور یہ صرف زیادہ عمر کے مرد وخواتین نہیں جنہیں اس حوالے سے فکر مند ہونا چاہیے کیونکہ یہ بات محض ایک افسانہ ہے کہ 45سے پہلے تک کولیسٹرول کی سطح ہمیشہ کم ہوتی ہے لیکن اب ا یک اچھی خبر ہے، ڈاکٹر کولیسٹرول پر فتح حاصل کرنے کے لیے نئے طریقے دریافت کررہے ہیں۔آئیے ان کا مختصر جائزہ لیتے ہیں۔

ایچ ڈی ایل باقاعدگی سے لیں: یک ناسیرشدہ چکنائی (Monounsaturated fats) جو کہ بعض خشک میووں کے علاوہ زیتون اور کینولا کے تیل میں پائی جاتی ہے نقصان دہ کولیسٹرول ایل ڈی ایل(low density lipoproteins))کی سطح کو کم کرتی ہے کیونکہ یہ سیر شدہ چکنائی(saturated fats) کی جگہ لیتا ہے اور مزید یہ کہ یہ ایچ ڈی ایل(high density lipoproteins)، جو کہ مفید کولیسٹرول کہلاتا ہے، کو بھی کم نہیں کرتا ہے ۔

اگر خواتین کی خوراک میں نصف سے کم سیرشدہ چکنائی کو کاربوہائیڈریٹس سے بدلا جائے تو دل کی بیماریوں کا خدشہ پندرہ فیصد تک کم ہوجاتا ہے لیکن اگر سیرشدہ چکنائی کو یک ناسیر شدہ چکنائی سے بدلا جائے تو یہ خدشہ 35فیصد تک کم ہوجاتا ہے لہٰذا آپ کو چاہیے کہ مکھن کی جگہ زیتون کا تیل ، بغیر چکنائی دودھ اور بغیر چکنائی گوشت کا استعمال کریں۔اس طرح جن لوگوں کو وراثتی طورپر زیادہ کولیسٹرول کامسئلہ ہے یا جنہیں دل کی بیماری ہے انہیں ہفتے میں دو سے زیادہ انڈے استعمال نہیں کرنے چاہئیں۔

نقصان دہ کولیسٹرول دور بھگائیں: چکنائی سے 30فیصد سے زیادہ کیلوریز نہ لیں۔تاہم سیرشدہ چکنائی کی مقدار کو کم رکھنا کولیسٹرول کو کم کرنے کے لیے سب سے بہترین حکمت عملی ہے اور سیر شدہ چکنائی سب سے زیادہ گوشت اور ڈیری کی مصنوعات میں پائی جاتی ہے اور اس کے نتیجے میں جگر شریانوں کو بلاک کرنے والا ایل ڈی ایل کولیسٹرول زیادہ مقدار میں بنانے لگتا ہے۔ لہٰذا اپنی خوراک میں گوشت اور ڈیری کی مصنوعات کی مقدار کو کم سے کم رکھیں۔

تھائی رائیڈ کی سطح کو قابو میں رکھیں:ہائپو تھائی رائیڈ کا مسئلہ خواتین میں خاص طورپر بہت عام ہے جس میں حلق کے قریب پائے جانے والے یہ غدود بہت زیادہ متحرک ہوتے ہیں۔اس کا علاج نہ کیا جائے تو اس سے کولیسٹرول کی سطح میں قابل ذکر اضافہ ہوتا ہے۔اس کے نتیجے میں تھکن ، سردی سے حساسیت ، بالوں کا نقصان ، وزن میں اضافہ ، جوڑوں میں درد اور ڈپریشن جیسے مسائل لاحق ہوجاتے ہیں۔

وزن کو قابو میں رکھیں:ہر گروپ کے لوگوں میں موٹے افراد میں نقصان دہ کولیسٹرول ایل ڈی ایل زیادہ ہوگا جبکہ جو لوگ دبلے ہوں گے ان میں یہ سب سے کم ہوگا۔

متحرک رہیں:صرف خوراک کے ذریعے مفید کولیسٹرول ایچ ڈی ایل میں اضافہ کرنا اچھا نہیں لیکن اگر ورزش اور غذائی ردوبدل کے ساتھ ایسا کیا جائے تو زیادہ بہتر ہے۔ورزش کے نتیجے میں ٹرائی گلائسرائیڈز بھی کم ہوتا ہے جو کہ خون میں شامل ایک اور قسم کی چکنائی ہے جو کہ دل کے لیے نقصان دہ ہوتی ہے۔

شراب ترک کر دیں: شراب نہ صرف ہم مسلمانوں کے لیے مذہبی طورپر ممنوع ہے بلکہ یہ صحت کے لیے بھی نقصان دہ ہے۔شراب نوشی کے نتیجے میں نقصان دہ کولیسٹرول میں اضافہ ہوتا ہے اور دل کی بیماریوں کے ساتھ ساتھ اور بھی کئی مسائل جنم لیتے ہیں۔شراب بلڈپریشر میں بھی اضافہ کرتی ہے۔

ریشہ دار غذائیں زیادہ کھائیں :ریشہ یا فائبر جئی ، جو ، چاول ، پھلیوں ، دالوں ، کینو مالٹوں ، سٹرابری، گاجر اور سیب میں بکثرت پایا جاتا ہے اور یہ ایچ ڈی ایل کو کم کیے بغیر ایل ڈی ایل کی سطح کو کم کرتا ہے۔بعض قسم کے دلیے ایک حل پذیر فائبر ’’پی سایلیم‘‘ سے فورٹی فائیڈ کیے جاتے ہیں جو کہ قبض کشا ادویات میں بھی شامل ہوتے ہیں۔جن لوگوں میں کولیسٹرول بہت زیادہ ہو اور وہ بارہ گرام پی سایلیم فائبر روزانہ استعمال کریں تو ان کے کولیسٹرول کی سطح میں مجموعی طورپر پانچ فیصد کمی ہوگی۔

اومیگا تھری فیٹی ایسڈ:یہ فیٹی ایسڈ سالمن ، میکرل اور دیگر مچھلیوں میں پایا جاتا ہے اور یہ چکنائی ٹرائی گلیسرائیڈ کی سطح کو کم کرتا ہے اور چونکہ مچھلی میں سیر شدہ چکنائی کم ہوتی ہے اس لیے نقصان دہ کولیسٹرول ایل ڈی ایل کی سطح کو کم کرنے کے لیے یہ بہترین غذا ہے۔

کولیسٹرول کم کرنے والی 6 مفید غذائیں

مچھلی

اومیگا تھری نامی ایسڈ سے بھرپور مچھلی جسم میں نہ صرف نقصان دہ کولیسٹرول کی سطح کو کم کرتی ہے بلکہ یہ خون کو جمنے سے بھی محفوظ رکھتی ہے۔

مالٹا

مالٹا ایک سٹرس پھل ہے، جو پیکٹین نامی نشاستہ دار غذائیت سے بھرپور ہوتا ہے۔ پیکٹین کولیسٹرول کو خون کی نالیوں کے ساتھ چمٹنے سے باز رکھتا ہے۔ ایک مالٹے میں دو سے تین گرام حل ہونے والے ریشے، وٹامن سی اور پوٹاشیم کی کثیر مقدار ہوتی ہے، جو جسم میں کولیسٹرول کی سطح کو بڑھنے سے روکے رکھتی ہے۔

لوبیا اور مسور کی دال

لوبیا اور مسور کی دال میں شامل پروٹین کولیسٹرول کا بہترین قدرتی علاج ہے۔ لہذا کولیسٹرول سے نجات کے لئے ادویات کے بجائے لوبیا اور مسور کی دال کو اپنی روز مرہ کی خوراک کا حصہ بنائیں۔